Pasal je dan od namoraneh, to Valentinovo. Pak je zarad njega bilo se puno teve jubavi. Čudo koliko! I vole se na si načini. I kad su grintavi, i kad su siromašni, i kad su bogati, kad njin odmažu bližnji i dalnji i kad njin ti isti pomoru… jubav je bol a ki voli ta je vol, Trsašćica zbraja. Aš da ča će bit s te jubavi kad se med poji. I odgovara samoj sebe, aš ju već nijedan ne nasliša, će bit ča bude. Jubavi ne fali ni va pulitike. Sako toliko nekega va pržun peja. Pobarku opet ne zoven, dokle se parićuje inauguracija od Prvega Našega. Će bit vremena za pozivi kad se stvari na vrhe oštajunaju. A lahko da je i poziv dobila. A ne kako Trsašćica ka bi platila. Za takov poziv, aš da bi njin tamo sen skupa prišla neč reć. Onako po njiju, trsačko-bodulsku, ma ne bin otela da se nijedan Bodul ofendi. Tr ča ga Boduli imaju z inauguracijun. Jedino ako te njih pršut tamo rezat. I ako će Lesica još kakov škandal otkantat.

A dokle je sneg zaprašil do pol Učki ga je bilo. I puhalo je i minusi je bilo. Ma mi smo va teplen gledali se one teve reprizi. Pak se dogajaju i podrški onen ki ne kupuju niš va butigah po soj draginje ka nas je tokala. Gledan i vidin kako neki ipak gredu va butigu, ma samo po užance. Aš su vavek hodili kupovat i bili va nekoj butige. Kako sad ne bit va nijenoj?! I tako cirkus naprvo hodi. Po pravice mu je i vreme, aš je pravo pusno. Jušto za si cirkusi. San bila neč računala da će ovo leto pust malo durat, ma su mi oni pravi pusni judi zajeno dopovedeli da ga ovo leto je, tega pusta.

Privezali su ga

I onda mi se opet Trsašćica javja sa zvan škvadri: privezali su ga, privezali su ga! Mamo moja mila, ča su ih i veževat počeli. I va misleh mi blisne ona remetinečka slika. Ava mane, ča dotle smo arivali?! I sa prestrašena san se počela obrnjat okol sebe, gledat ako se iman za ča ćapat, da me vranić ne odnese prej dobi, ki zna kamo, nekamo va kakovu nevoju. A Trsašćica zmami, i ona sa zvan sebe: Galeba, Galeba su privezali. Našega, Titotovega Galeba! Sada me more i vranić odnest kamogod će. Malo zaten i naš gradonačelnik je vas vesel i govori kako će ovo bit baš pravi muzej. Ki će plavat. Muzej od mora i po moren z jeno malo Titotoveh spomeni. Aš sega drugega imamo više, dopoveda on. A Trsašćica opet zvan sebe: dobro je rekal, dobro je rekal. To na gradonačelnika misli. Aš nikad nan već neće bit onako kako nan je bilo kad je Tito po svete jadril. Se spametite kako mu je cel svet na sprogod prišal? Zija sada već na me. Ča ste pozabila? I čudi se. Nigdar do onda ni od onda nijenemu presedniku nigdere na svete ni cel svet prišal na sprogod.

Ča je, je, nazad san zdahnula, sa va nade i ufanjen da se v Reke neće već niš negdere veževat. Aš to bi baš previše bilo. Ale Trsašćica ne moluje. I znate nigdar više nan onako dobro neće bit kako kad smo va Titota gledali. Nigdar i dramu još malo pozgorun zdiže.

A ja se ne usudin ni dihat. Ni mislet na se ono ča je svojni bilo. A bilo je, je, ne da ni bilo. Nego kemu ćeš to danaska dopovedet. Kad cel svet va Minhene opet drami radi nekeh drugeh ne preveć lepeh stvar. I tako vidin da mi se pulitika smiron po sloveh vuče. Ostalo mi je po pravice još i malo jubavi. Mačje. Aš opet po su noć nakantuju svoje serenadi, i naši i susedski mački. Magar ih uho čuje kako nekakov zavijajući plač. Ovo zadnjo san dodala radi drami.

Moj NajPrvi hodi po butigah i gleda kade bi ča ceneje kupil. Ovdan mu se se čini jako ceno. Ma se naprvo pojida da dokada to more durat, to tako ceno. Ja se ne razumen va te ceni, kako ni va one već pojedene penzije ča ih Trsašćica smiron spominje. Ma radi tega, ča ja neč ne razumen, neće bit nijenemu huje. Jedino va to verujen, aš druge mi ni.

Sneg do pol Učki

I onputa on sneg do pol Učki, to je bila slika! Niš nan ju ne more pogrdet, tu Učku. Vavek je lepa i najzad oku našemu naša. Neka bude i malo poezije.

Ne znan ako je i van zima, kako ča je mane. Pak se doma teplin. I gledan s teplega vanka i mislin kako će vaje opet bit vreme za poć po moren pejuzdat. Pak mi srce naraste. Od prave jubavi. Za su ovu lepotu ku imamo, magar i maškaranu. Magar i prez nijenega vica. Tr vas vic je va ten ča još nekoliko gibjemo. Kigod će i poskočit s potresujkun i za zvončari i za maškarami i na Korze, aš i kraj i krajica su već parićani, mladi i lepi i puni voji.

Ja, ta voja je jena jako čudna stvar. Čovek se neč zmišja i namišja i onda ga voja od nevoji prekine. Pak doma duri, a svet je vane na si kolori, magari i smržnjeni.

A za tu smrzalinu dobro je popit malo rakijice, magar malo stavit va kafe. Neka bude koreto. Neka bude za dušicu steplit, pak neka onda i ona potancuje va nedreh. Kako da je pusno vreme. Neka da još malo, neka da, aš vaje će popelnica a onda te se smrznut se radosti do…