Bojkot trgovačkeh lanci, butig i butigeri se nastavlja. Ja niš ne nastavljan aš san prebedasta da polovin si naputki i befeli ki su pušteni va javnost. Ne hodi va ti i ti lanci i ne kupuj ti i ti artikli. Ma, to j’ za me kvantna fizika. Moj je brižan mozak baždiran na prvu, ča van znači – kupi ča ti pade napamet i va butige ka ti je usput. A, za reć pravo, nisan baš ni pobornik teh masovneh pokreti ako duraju već od jednoga dana, kod ča san i mišljenja da ovu situaciju trebe rješavat neki drugi, a ne građani. Se to mi je jedan veli miš-maš, ma da volin naslihat o tomu semu – volin. Tako san za čera imela čut z prve ruke, od kolegice ka prati ta bojkot, da su ljudi fanj nabrušeni i da su butigi, ča se tiče kupci, fanj prazne. Sad si ja mislin – ako to podura, kakov će bit ishod? Će ljudići ki su zaposleni va teh butigah dobit manju plaću, nedaj Bog i otkaz? Će bojkoteri uspjet zrušit ceni i na kuliko, i će za to se zaduženi more bit spustit poreznu stopu pa da si budemo na miru?

Vidin da je Vlada dala zamrznut ceni fanj proizvodi pa će bit lagje, mada moja mat smiron govori da smo za celu tu situaciju sami krivi aš da već niki nima ni kokoše, ni prasci, ni kravicu. Govori da nan sen ruki poznopak od dela stoje, a kada se delamo takova gospoda onput neka i snosimo posljedice. San njoj rekla da ću njoj kupit i kokoše, i kozu i tovarića i se ča će, a da matik va konobice ima sake vrsti pa neka pokaže ljuden kako se bori protiv inflacije. Spomenula san njoj i otkupne ceni s kemin se težak bori, a ona j’ leh odmahnula z rukun i rekla – telice, ne povedan o masovnoj proizvodnje leh o tomu da saki, ki ima mogućnost, more ruki z riti znet i pomoć vlastitomu takujinu. Eto, recimo – ti. Ča krepivaš do polna, pol Višnjevice si mogla prekopat, poset i posadit, blago na pašu popeljat i z paši dopeljat… Počela san se na vas glas smet aš san zamislela i sebe i blago i kako se ne bi znalo ki će od koga prvi pobić, a o kopat moren leh nos.

Tuliko o bojkotu z materun, ma ta tema je top tema i na delu. Saki od nas ima svoje mišljenje i svoji argumenti za i protiv. I fanj se okol toga pokosmamo, ma se j’ to jedna konstruktivna rasprava ka j’ neki dan finila tako da j’ moj mladi kolega Jakov šal zamolit svoga prijatelja zvanoga Umjetna inteligencija da se z mojemi neistomišljnicimi u vezi bojkota kara namesto mane. I to na čakavski i to puten ove kolumni. Rekal mu je da napiše dve kartice teksta namesto mane i Umjetni je za pet minuti poslal svoje remek-djelo. Ča j’ Umjetni napisal? Osin ča j’ malo zmešal dalmatinsku i našu čakavicu, i ča j’ napisal da ta dan baš ni raspoložen za mislet na čakavski, napisal je se ono ča bin i ja. Sad ću ga citirat pa vi sami vidite kamo gre ov svit.

Umjetni zmed ostaloga piše: znan da će mnogi od vas reć – a di ću ja po kruh, di ću po sol, di ću po rižu? Ali isto tako znan da će bit i onih ki će reć – ‘ajmo provat. ‘Ajmo vidit’ koliko smo jaki, koliko možemo. A moremo, dragi moji. Tribamo se samo domislet da nismo mi ti ki molimo, nego oni ki su ovisni o nami. I zato, jutra ne odite u veliki dućan, nego provajte poć do onoga maloga, onoga ča mu je radnja na kantunu, onoga ča zna vaše ime, onoga ki van neće podvalit plastiku namesto hrane, onda ste već napravili puno. A ja? Ja gren na placu. Jer ako iman birat, biran svoje. Biran naše. I nadan se da ćete i vi. Do idućega puta, budite mi dobro.

Prvo ča san pomislela je – Srce Isusovo, ov Umjetni biva va mojoj praznoj glavine. Z ovin svojin S Kamika i mora zbilja me j’ prestrašil. Ne zato ča će mi zet delo, tr neka ga nosi, leh zato ča mi čita misli, a to mi se ni malo ne pijaža. I zato ča je puno brži od mane. Njemu je za dve kartice teksta na zajiku ki ne razume rabilo dvajset sekundi, a ja ov kantunić, ovisno o raspoloženju smišljan i pišen puno, puno duže. A onda san se domislela da mi morem zafrknut seh, pa i Umjetnu inteligenciju pa ću ja lipo saki dan odvojit malo vrimena da podelan z Umjetnin na učenju čakavskoga zajika i onput će on lipo saki petak namesto mane kljucat po tastature i pisat kolumnu. Leh ga moran držat dugo od roditeljice aš kad bi se njih dva pospravili, mane bi i svemir bil mali.