Gljedan kroz poneštru i samoj sebe govorin – siroto, komać dočekaš zimu, a kad zazimi ti kod tić va gajbe. Gljedaš ju, ne ćutiš je. Vane prelip zimski dan, znate ono kad šćiplje za obrazi, nos črljen – curi, a ti ne abadaš, ručice va žepu, ako padeš ode nos. I kapa va žepu aš imaš kapuc, a i spod nje glavina srbi.

Šjal si pozabil, ma ni te baš jako briga. Se ti je nekako lipo, friško i puno forci. Se bin to ja rad okusila ma kad ujden va ov rudnik, ne zihajan do noći, a to onda već ni to. Pitate me zač se zimun ne kumpanjan po jutru. A kako ću, moran i ja nekad spat. Intanto, lipa j’ ova zima, čak i preko poneštri. Ono ča ni lipo je to da će nan sopeta ceni poć gore, a plaći ostat tu kade su uz onu vječnu – bog da su. Naslišan kako će nan krešit celi vagun toga, ma čitan i kako će vlada donest befel ki govori da trgovci nete smet dizat ceni određenemi proizvodimi. Sad me baš zanima kakov će bit omjer, odnosno će to još jedanput bit ni vrit, ni mimo ale će bit ča korisnoga. To van je kako i kod benzina. Jedan utorak poskupi, drugi pojeftini i nakon leto dan dokončaš da si uza sa pojeftinjenja sopeta fasoval. Ne razumen se baš va matematiku, ni va broji općenito, ja san vječni optimist ki zija – saki vritnjak naprvo. Ni važno kuliko te ta vritnjak zaboli, glavno j’ da te poriva. A rivanje va, kako za janar reču – najdužemu mesecu va letu, sen nan rabi. Vranić zel ti silni adventi i nas ken su vavek veće oči leh je rit.

A ni riti nan nisu baš male. Ako j’ verovat onen ki jih mere, mi postajemo se deblja i deblja nacija. Uostalon, ne rabi sad poć čitat studije ke se z ten bave, dosti j’ sest na Korzo i malo gljedat. Neki od nas ne moraju nikamo poć, dosti nan se j’ pogljedat va zrcalo. Lahko za nas ki smo već pasali pol stoljeća življenja, ma ča j’ z onemi ki su tek va prvomu desetljeću? Si govore da su nan deca strašno debela ale kako se to sad reče – pretila. A kako brižna i neće bit kad već ni ne znaju ča j’ ravnica. Ste i sami mogli pročitat da njin je motorika šla mater ženit. Kako neće kad se na drvo nikada nisu poprtili. Još se ni ne rode, a već njin je mobitel v rukah. I sada kad je vranić zel škerac, kad gori spod pet, e, sad ćemo va školami malo promenit jelovnik. Ne bin otela štrigat prvo leh krene, ma me par da niš jako od toga aš more va školah bit zdrava i najzdraveja marenda, dečina će kad dojdu doma sopeta jist ono ča i inače. I ča smo s ten načinili? Rabi najprvo odgojit roditelji pa onput decu. A roditelji, ki delaju po cel Božji dan ni nimaju lazno za kuhanje i nakuhevanje zdravoga jida, ča bi moja mat rekla – onoga zlicun. Ako ćemo pravo, mnogi nimaju ni soldi za takov jelovnik aš pu nas je se poznopak pa i to. Pu nas se ča j’ zdravo više košta leh ono nezdravo.

Z druge bandi, pogljedajte samo glavnu rečku šetnicu. Pa va njoj su leh burgeri i se ono ča spada pod brzo jido. Zdravljaka ni za lek. Kamo smo došli kad je danaska va odnosu z temi američkemi pizdarijami burek zdravo jido? Intanto, držin fige za tu reformu marendi i usput se domišljan na ča san ja se z noson obraćala doklen san jila marendu va škole, a to j’ bome cela osnovna škola. Najveseleji dan je bil kad su bili sengvić i jogurt, a on črni kada j’ bila šimunela. Da bi njoj se seme zavavek zatrlo! Ma, ni mat kod ove današnje davala soldi da si kupin ča drugo ako to neću jist. Bilo j’ ili ji, ili budi lačna. I bila san ta dan lačna, ma kad bin došla doma ni me trebelo kod drugi dani tirat jist, sama bin pitala, a roditeljica bi leh rekla – aha, šimunela. Morda j’ to pravi recept da zaživi ov novi model prehrani va školami.

I za kraj, da ja vas pitan ono ča moja draga mat mane saki dan pita, a glasi kad i kade će predsjednik Milanović imet prisegu. Njoj odgovorin da će brzo, a kade da se još ne zna, pa ona onda nagaja i nagaja i tuliko me z ten davi da san njoj rekla da će namesto spod Plenkovićeve poneštre imet spod njezine i da će mu ona pjevat himnu. Dakako da me j’ vrit poslala i to zajedno, a to da j’ rekla kako bi ona to bolje od Lesice, to ste valjda očekivali. I si drugi nagađaju ki će kantat, a ja preporučan da himnu otpjeva nekakov zbor, a da mu »Tvoja zemlja« otpjeva mali Kosovec aš mi j’ već puna pipa seh teh kvazi rokeri, ki su huji od seh oneh ingleškeh ki bi riti dali za titulu »sir«.