Mislela san da se ovo ča se j’ dogodilo va Zagrebu, nikada, ama baš nikada neće dogodit pu nas. Nažalost, ono ča j’ odvavek bilo »tamo negder dugo«, došlo j’ blizu i šokiralo se normalne ljudi ne leh va Hrvackoj – va celomu svitu. Moja mat ni mogla doć na se aš va njejen poimanju zla, ovakovo ča ne postoji. Zajedno j’ iskala kade njoj je ča za smirenje, a onput san celo jutro naslihala – pa kako, pa zač, jadna deca, jadni roditelji…

Onput me je pitala da ča se vrata od školi ne zapiru kada počne nastava i još milijun stvari njoj ni bilo ćaro. Kad san došla na delo, sa san ta pitanja sopeta čula. Jedino ča ja moren reć je da j’ tragedija strašna i da j’ sad zabadava pitat i ovo, i ono.

Pojidat se j’ trebalo prvo i to okol toga dečka ki j’ načinil ovo ča j’ načinil. Pojidat se i spravit ga tamo kamo mu j’ bilo mesto. Mišljenja san da su i ovoga puta, uz njega, krivi i institucije i si oni ki nisu prepoznali da ni vas svoj. Ili ča j’ još huje – su, ma nisu reagirali ili nisu ozbiljno reagirali. I jušto zato ni više jednoga anjelčića ki još takoreć ni ni počel živet i ki j’ va danu kad je trebal proslavit svoje prvo školsko polugodište – umrl.

Sućut obitelji, a na sramotu seh oneh va sustavu ki ako su mogli nisu reagirali. Molin Boga da si drugi ki su ranjeni budu dobro, da se dečica ka su preživela ov šok ča prvo i ča uspješnije oporave i da konačno va ovoj zemlje si počnu delat delo za ko su plaćeni, a ne leh dohajat na delo, sedet i čekat plaću.

I opće mi ni do ničesa danaska, pa bin najraje da moren i ja odgodila ovu kolumnu, kod ča su mnogi, radi ove strahoti va Zagrebu, odgodili već zakazani programi. Ma, ja ne moren, pa ću vas najprvo popeljat va špežu i to va Ilirsku Bistricu.

Bila san ki’vo dan gumi promenit pu Kalistra va Dolenju pri Jelšanah. Ča zač pu Kalistra? Pa zato aš je jeftineje leh je pu nas, zato aš je kulturnuje leh je pu nas – naručiš se, dojdeš, odbaviš, platiš i projdeš, se va pol uri – i zato aš z jednin udarcen poklopin dve muhi.

Usput gren po špežu. I sopeta je na pitanje – zač, odgovor isti kod maloprvo. Da nisan jedina ča tako misli svjedoči ono RI na registracijah mora auti parkiraneh spred butig. Kad ujdeš nutar čuješ leh hrvacki.

Sad da me pitate poč je ča i kuliko se more prišparat, najiskreneje van govorin da niman pojma aš ja nikada ne pamtin kuliko ča košta osin cigaret, ma nisu si trubile kod ča san ja pa ako si govore da se splati, onput se – splati.

Govore i da je Trst još jeftineji leh je Slovenija, ma va Trstu niman vulkanizera pa mi ni bilo usput, ča ne znači da neće aš je mane odvavek i zavavek se usput.

Veseli me i ča vidin da se beli Učka, i ča čujen da će za Božić na Platku mnogi, ako budu oteli – skijat. Znači da nan je »beli Božić« na korak od nas. Znan da mi sad moj prijatel Zlobina, poduzetnik Polić, kreše se po spisku i mane i snegu, ma onaj ki nima – želi, a onaj ki ima – ne haje. A kad smo već pu Polića, od srca me je nasmel kad je objavil da ima va ponude leh prepeličja jaja aš da su mu djelatnice šle na Silbu. Ma, nasmeje on mane puno puti, no i dalje je moj čovik broj jedan na celomu Zlobinu njegov otac. Tr ne pada jabuka dugo od drva. Intanto, i njin dven kod i celomu Zlobinu čestitan i Božić, i Stipanju, i Ivanju i Novo leto i želin njin se haj – naj. Spomenula san Stipanju pa koristin priliku da vas obavjestin da j’ na Stipanju »adventiranje« va Domu na Zlobinu. Ne sumnjan da će bit dobra zabava pa preporučan.

Za one ki se boje snega i ne bi šli na beli Zlobin, obavijest da su va Svetomu Lovreču i ovo leto pripravili žive jaslice. Celi sv. Lovreč će bit Betlehem na Stipanju i tretega prvoga 2025. pa ki voli nek’ izvoli. Bila san lane i bilo mi j’ super – i anjelčić ki po žice na deset metri leti na glavnomu trgu, i malin, slapi, tovarići, ovčice, kokice, ma se. A za pojist i za popit čuda tega, a se fino. Imeli su i falši sneg spod koga su se mnogi oteli slikat, kod i dobro označene »prometnice« nutar mesta. Najme, gre se kružno i jednosmjerno doklen si trezan, a pokle ki i žbalja ma mu niki ne zameri. Se ovo govorin za one ki gredu hodeć, a auti ionako ostaju na parkiralištu spred Lovreča.

To bi bilo to – sen na zemlje mir, veselje. I onen va svemiru, isto.