Najprvo da van se pohvalin – dobila san i ja regal za svetoga Mikulu. Bog dal zdravlja i srići gospe Margite Kocijan ka me j’ jako razveselila. Najme, gospa Margita je pročitala moje skucanje okol toga kako me j’ sveti Mikula pozabil, kako me j’ i Krampus pozabil i kako su me si pozabili, pa san joj se smilela i po hćere, ka j’ moja kolegica, mi je poslala regal. Ne moren van objasnit kako san bila kuntenta, sen san ta svoj dar pokaževala i sen tumačila kako još ima dobreh ljudi. I sa tako zadovoljna san došla doma i govorin roditeljice i paronu, onemi istemi ki su se delali bedasti na moj komentar da otkada oca ni, ni Mikula ne haje za moju čižmicu, da me se j’ Mikula intanto domislel. Povedan njin i pokažujen ča mi j’ donesal, a oni me gljedaju va čudu. On govori – ti nisi normalna. Ona govori – kad san još rekla da si ciganon z kol pala. Va prevodu mi obadva govore isto – leh nas okolo sramotiš. Nisan ih abadala, odgovorila san – da mi se niki ni slučajno ni popačal va ovu kikaricu na Orešara, da se niste drznuli ni pogljedat va moji šetokalci, a keksići morete pojist aš nisan ja vi. Mat je, koda iman pet let rekla – si se zahvalila gospe, a paron – ne daj Bog da sad prosiš okolo neš za svetu Luciju, mi ćemo ti kupit.

I eto, operacija »daruj bližnjega svoga«, uspješno izvršena. Ča se tiče svete Lucije, šenica j’ posejana, mada znan da će bit kod i sako leto do sada. Doklen je pokojni mačak Mario zvan Nau bil živ, on je siroti bil kriv kad ne bi zrasla onako kako j’ roditeljica zamislela. A to ni bilo nikada. Vavek bi zijala da ju je on okosmal, pojil, zvrnul i ča ja znan ča bi mu se prikrpala. Kad je on partil va mačji raj, ča mislite ki j’ bil kriv? Pa, naravno, ki drugi ako ne ja. Brontulala je – preveć si ju zalevala, klala si ju na propuh, ki j’ videl da će neš uspjet ako ni na suncu, zrušila si ju… Tako j’ bilo se doklen se nisan domislela kako njoj doskočit, a rešenje je – dočin vidin da šenica vodi suprotnu pulitiku od one ku j’ zacrtala moja draga mat, brzo va market po novu, i tako ja od Lucije do Vilje Božje promenin bar dve šenice i si kuntenti. Je da njoj ni ćaro kako se ta sakramenska šenica preko noći refa, ma i za to ja iman odgovor.

Leh njoj rečen da san šenice dala aspirin aš da san čula da to pomore. Kako j’ njoj aspirin lek za se, ni njoj to niš čudno. Čak je i tete, svojoj sestre tumačila da ako njoj šenica ale ka druga biljka ne gre kako rabi leh da njoj va vodu klade aspirin i da će doć na se. Ako tako nastavi, čitat ćemo kako va Lipoj našoj građani najveć kupuju aspirini, a ne kod i do sad leki za smirenje. Ekola, ni sako zlo za zlo.

Tuliko o bližnjemi, a ča se tiče oneh daljeh, na političkoj scene ama baš niš novoga. Kandidati za predsjednika su skupili potpisi, ponesli su ih tamo kamo se nose i oštro koraknuli va presjedničku kampanju. Ne zna se ki koga već blati, ki komu već podmeće, ki po čigovoj blatnoj robe već kopa. Se j’ to jedan veli cirkus. Po besedah ke koriste ima va njemu i klauni, i sloni, i majmuni, a kačak, to da ni ne govorin. Recimo, si su se smeli okol brižnoga Nika Tokića Kartela ki se j’ pred kamerami rascmizdril i rekal – mama, uspio sam, bit ću kandidat, bit ću predsjednik Hrvatske, a moja mat je rekla kako j’ to pravi sin i pravi muški aš da leh pravoga muškoga ni sran plakat pred ljuden. Odgovorila san njoj da se ne bin baš složila, a ona j’ počela zijat kako to od mane ni ne očekuje aš da se ovakovo blago kod ča san ja ne bi matere ni domislelo, kamo njoj tako ča lipo reklo, a on je leh dokazal da svoju mater voli i poštuje. To ča cmizdri spred kamerami, pitan ja i dodajen – to j’ leh dokaz da j’ mat odgojila plačipišku, a ne presjednika.

Muč nesnago, mnoge će materi za njega glasat baš zato ča j’ pokazal da j’ čovik. Niš nisan odgovorila aš me par da j’ va pravu. Emotivna smo mi nacija. Ča se pak tiče predizborneh plakati, ni tu ni baš neš novo, ni baš neš posebno. Kad pasevan iman dojam da san se već videla – isti ljudi, iste floskuli… Kod ča su isti i komentari okol ovoga zvlačenja za Mundijal. Opet naslišen – najteža grupa, bit će teško, nismo imeli srići i slično. A vavek bude se ok. I za kraj – znate ki me j’ zval na kafe…