Bele koke z neba pale, so su selo zatrpale – ča je to? E, pa to j’ ono ča ja od mićeh nog sanjan da pada saki dan aš ako ki obožava sneg, to san ja. Skijat ne umen, ma na sanjkah san i dandanaska prava mustra – moren i normalno, i na trbuhu i na stat, ma kako god, a ako i pljusnen tr neću dugo od zemlji, odnosno snega. Vozit po snegu mi isto ni problem, mada se leda grozin, ma kada se mora – a, da ča leh je teško, ma gre. Klizališta mi nisu neš aš toga nisan imela kada san bila mića pa mi nogi nisu na ta sport navadne, a iskreno, ne čini mi se to klizanje tako bezopasno.

Najme, ako fljusneš na rit va sneg, malo se natučeš i greš dalje, ma ako fljusneš na rit na ledu, e, onput to more bit veli problem. Iman kolegicu ka j’ tako fljusnula još pred već od leto dan i još vavek njoj rit ni došla na svoje. Sirota doklen piše sakeh kvarat ure mora promenit položaj pa ki put pomislin kako ću ju videt da z lustera visi i mlati po tipkovnice. A si govore, udri po rite aš rit nima dušu. Vranića nima, altroke ima i rekla bi moja kolegica – vraški boli. I duša i rit.

Intanto sneg je pal i sopeta mirakuli okol toga. Ki put pomislin da smo mi mirakul nacija aš ga načinimo kade god dospenemo. Pa kada bi sneg trebel padat – morda po letu? I kakovo j’ sad čudo i kakova su čudesa ako j’ sneg pal va Gorskomu kotaru, va Like ale na Učke? I ča j’ novoga va tomu da j’ pošemeril vas promet, da su zastoji i tomu slično? Si se zajedno dignu na zadnje nogi i počnu lajat na brižni cestari, a niki ne pomisli da j’ cestaron zlo i naopak aš moreš ti imet svemirski stroji i makine, ma ne moreš protiv prirode. Tr ralica pasa i očisti, a raličar se ni ne obrne, a zad njega je se sopeta belo. I ča j’ sada on brižan va semu tomu kriv? Ma, niki ne bi rekal – ja san kriv ča j’ zastoj va prometu aš nisan na vrime promenil letnje za zimske gumi, a sedno san, mada san znal da va Gorskomu kotaru pada sneg šal nepripravan za Zagreb. Nepripravan znači – bez zimske opremi. E, to nidan od nas neće reć. Lagje je optužit brižni cestari ki po cele dani i noći snaže po cestah. Sad će neki reć – zato po lete miruju. Ne znan ča po lete delaju, ma da bi va ovoj države neki dobil plaću za legilo, a da se ne bavi z politikun, to nekako ne verujen.

A kada smo pu politiki i pulitičari, sad gre ono mane najhuje razdoblje ko se zove izbori. Majčice mila, ki će zdurat sada se te predizborne kampanji, sučeljavanja, obećanja, podmetanja, kopanje po tujoj intime i slično. Jedini dva ke znan, a da se semu tomu vesele, je moj prijatel i kolega Gromičan, za koga mi j’ jasno zač ga to zanima, aš fala Bogu, boljega političkoga analitičara med kolegami od njega ne poznan, ma zač to zanima i pojida moju roditeljicu, e, to mi pak neće bit ćaro va sto životi. Ono ča se njoj najviše pijaža su slogani, pa mi j’ tako ki’vo dan rekla da naš gradonačelnik ima slogan »kopat, ma ne molat« i da njoj je to baš dobar slogan. Odgovorila san – ča nos, a ona se j’ ofendila. Drugi dan mi je spominjala šjora Primorca ki da j’ rekal »čist sam kao kristalna čaša, nikad u kampanji nisam lagao«, ča j’ po njejemu mišljenju isto lipa usporedba. Odgovorila san – a, izvan kampanji. I opet se je ofendila. Sad smo neko vrime na miru ča se tiče slogani i lipeh besed.

Osin izborih i kampanj ono ča me va ‘vu dobu, ma neću reć jadi, ma mi pomalo gre na živci, to su si ti adventi. Me par da ni sela ni zaselka ko nima advent. Ne govorin da j’ to neš loše, ma ča j’ preveć, ni z maslon ni dobro. A advent saki nalik jedan drugomu – lampice, skupo jido i pilo, ako si bogateji i klizalište i se skupa zagrnuto va instant veselje. Pa kada još krenu z onen – najlipši advent uz more, najlipši advent z pogledon na more, najlipši advent z pogledon na jezero, pa najlipši advent na vrh brda i ča ja znan ča se ne, mane dojde da na vrata od kući napišen – najlipši advent va postelje i pravin se da san medved i da spin zimski san. A morda mi j’ danaska leh još jedan od oneh njurgaveh dani kad dopolne gren sen okol sebe na živci, a zapolne i njin i samoj sebe. Ma, pasat će i te kampanji, i ti izbori, i ti adventi, a do onda avah je mane i sen ki su mi blizu.