Avah, Si sveti su, si su drugi po cimeterih, a ja kljucan po ovoj tastature va redakcije. Ki put pomislin da doklen drugi imaju pravi prijateli s kemi provode i vrime i nevrime, moja jedina prijatelica je ova ista tastatura koj su se već i slova zlizala, i puna j’ praha, mrvic od mojeh obedi, ča će reć sengvići, i štufa i mane i mojega svakodnevnoga nabijanja po njoj.

Najme, si mi ki smo novinarstvo počeli na pisaćeh makinah, i dandanaska mlatimo po tipkovnice koda j’ brižna kriva za se zlo na ovomu svitu. Intanto, ja i njoj i kompjuteru koga, od prvoga do ovoga trenutnoga zoven Blenton, leh njin dodavan broji (mislin da j’ ovo Blenton VI, ma ne moren baš sto posto garantirat), saki dan kad dojden rečen dobar dan, a kad projden poželin njin lahku noć i miran san. Užan njin reć – ala sad curat i spat, da mi jutra budete kod novi. Ja, dobro j’, jasno mi je zač van sad psihijatar pada na pamet, ma mane su odvavek stvari žive kod i ljudi. I oni ki su, i oni ki nisu.

Mi prekčera nismo delali aš je bil dvobroj pa san bar do oca i seh drugeh drageh ki su na krasičarskomu groblju dospela. Si ovi drugi neka se potrpe, k njimin ću jutra. A ča stareja, to mi j’ već njih na onomu leh na ovomu svitu. Još pred par let mi je paron rekal kako smo nekada na trsatsko groblje dohajali z dve tri sveći, a da nan sad ni karijola ne bi bila dosti.

Ča se more, tako j’ to. Intanto san čera najprvo na groblju dobila otirač. Utaknula san Koku ki me j’ pital da ča ja niman 20 euri za kupit plastične rožice i donest jih ocu na grob. To se j’ odnosilo na činjenicu da tri meseci nisan kladala nikakove rožice, va nade da će on ili oni isti ča mi jih va roku od dan ale dva ukradu nać nekakovu drugu žrtvu. Ne znan ako će ma, ja san provala, a i ocu san, pa sada i Koke objasnila zač ni bilo rožic. Sad je sen se ćaro, osin mane aš nikako ne moren dokučit ta mozak komu niš ni sveto. Pa ako i ima neš protiv mane kod mane, ni mu moj otac niš načinil. Ma, ki sumnja ima hiljadu grehi, a ki načini leh jedan, pa ću mučat.

Ekola, sad san i to rekla i moremo dalje, a dalje je da mi j’ čera bilo jako lipo na cimiteru. Odvavek volin ta krasičarski cimiter, nekako mi j’ kod jedan mići teatar ale kod jedna lipa knjiga, bolje j’ reć sjetnjak. Tako san i čera obašla se one ki su mi va životu puno značili, ke san jako volela i volin. Celu svoju Višnjevicu, ča se podrazumijeva, a onput i ostatak Krasice. I san malo poćakulala, i san se vrnula va djetinjstvo i zbilja mi j’ bilo lipo. Seh koda sada čujen. I Iva ki njurga kako san se to obukla za poć na cimiter, i pokojnoga barba Branka ki zija na njega da pušća malu na miru, i tetu Vilku ka me špota aš ne gren nedelju na mašu, i Brana ki me pita kako san. Pa malo dalje majku Maricu ka me pita ako ću bombon, tetu Ljerku ka leh klima glavun aš ni nikada bila od veloga govora, pa tetu Katu i barba Vlada, tetu Slavicu, pardon Vazmoslavu i barba Zdravka, pa… Celo djetinjstvo mi na takov dan pasa spred očij.

Nikada me ni bilo strah cimitera, ni po noće, a kamo po danu. Vavek san va glave imela to da su tamo oni ki su me i ki će me vavek štitit i da mi niki niš ne more. Poznan puno njih ki ne vole poć na groblja. A, ljudi moji, si ćemo jednoga dana tamo finit. Neki prvo, neki pokle i protiv toga se niš ne more. Uostalon, čovik je živ se doklen su živa domišljanja na njega, a ja se mnogeh često sjetin. I ne leh na Si sveti, nego kad god. I vavek mi ta domišljanja budu lipa. Na one ki su bili zločesti se ne domislin, aš nisu opće vredni toga.

Oprostila san njin se ča san trebela i tu smo finili našu štoriju. I zemaljsku i onu nadzemaljsku. O takoven neka se pojidaju oni gore. Ono ča mane trenutno pojida je da su mi još rožice na mestu ale ću morat investirat va noćni video nadzor aš ni šanse da će neki neš po danu ukrast. Doklen barba Miko patrolira, tati ni. Ma, i barba Miko mora spat… Uostalon, koga briga – sjećanja mi niki ne more ukrast, a za rožice više-manje.