No, dobro, pasal je i ta Eurosong. Mali Lazanja finil je na drugomu mestu, ma za seh ki su pratili taj televizijski spektakl, zaspraven na prvomu. Uostalon, koga briga za mesto, glavno da j’ malčić zadovoljan i si mi skupa š njen. Sa mu srića na svitu bila, a Bog dal zdravlja i onoj Žaže ka j’ odustala od natjecanja na Dore. Intanto, si mi skupa blatimo po temi stručnemi žirijimi, a naš sam ni umel prepoznat Lazanju i ni ga zel na Doru, zato se ča j’ mali načinil – načinil je sam i zato mu skidan kapu. Čula san i da j’ zamolil novinari da ga pušćaju malo na miru da dojde na se i red bi bil da kolegi poslušaju aš ni lahko bit va njegovoj kože.

Ni lahko bit ni va kože seh oneh ki v Rike ovise o autobusu aš, kako san imela čut, pročitat, a i videt, v Rike ćeš prvo dočekat NLO leh kurjeru. Čitan ki’vo dan reportažu od kolegice ka se stalno pelje z buson i ne moren verovat da bilo ki va 21. stoljeću bilo ča čeka dve uri, a kamo gradski bus. Intanto, čovik poveda da busa na linije dva ni bilo jušto tuliko kuliko san napisala. Ma, na trepavicah bin šla kamo san naumila, čekala ne bin sigurno. I to van govorin ja, lena kod prasica, ka bi da more z auton i va kondot šla. Ti ljudići su strpljeni da j’ to čudo, aš kuliko san z toga teksta imela doznat, si čekaju, a to ča njurgaju, još najbolje da muče. Si i kasne, pa učiteljon ni problem opravdat dečine ka zakasne va školu aš ionako ne znaju ki će već zakasnit oni ale dečina. Najveć mi j’ bilo žal one jedne ka j’ četiri meseca čekala nekakov specijalistički pregled na koga j’ na kraju radi toga ča ni bilo busa – zakasnila, pa sada sopeta, ča bi stari ljudi rekli – Jovo nanovo. Ove mulce z Elektro škole vidin saki dan kako siroti teču preko četire trake spred Novoga lista aš – kasne. Najprvo san mislela da njin je sad to nekakova nova igra, a onput mi j’ došlo z riti va glavu da j’ viša sila.

Ni lahko bit ni šofer, aš na koga će nezadovoljan putnik ako ne na šofera. Neće sigurno poć va upravu Autotroleja, a ni va Grad zijat. E, ni njin ne bin volela bit va kože. To ča njin zdele, to ni pas z maslon ne bi pojil, a da nisu ni svjesni da laju spred kriveh vrat. I tako, si nezadovoljni i si frustrirani, a rešenja ni od kuda. Čak ga ni moja mat nima, a kad ga nima ona, e, onput je to već svjetsko čudo. Leh je rekla da j’ srića od Boga ča ne mora niš i nikamo. Onput je mane zasrbel zajik, pa san bez puno mislet, a to – pravo j’ reć, nikada ni ne delan, rekla da ni on vagun penzioneri ča se považa z busimi nimaju baš kamo poć ma sedno gredu leh da njin rit puta vidi i da su jušto oni sad, va ovoj busnoj krize, najglasneji i najnezadovoljneji, izazvala skoro pa treti svjetski rat. Majčice mila kad je počela i o tomu da leh nesnaga ka ne poštuje stareji more takovoga ča reć, da ni sleda nisan na nju aš da se pu nje odvavek znalo da su stareji ljudi sveti ljudi kemin se nikada ni ne pomisli ča grdoga reć, a kamo njin reć i da niman ni malo odgoja. Pa san ju pitala da ki me j’ odgajal ako ne ona i dobila šćapon po rite. Njurgala j’ celo zapolne, a ja san se šegavo povukla va svoje odaji i pravila da me ni. Do k večeru je već pozabila i na bus i na stareji i na kar, a ja san pazila da ča ne blebnen pa j’ bil mir va štalice.

Bi ta mir i podural da ni počel Dnevnik pa se j’ zmaj sopeta zbudil i počel rigat vatru i na ovo, i na ono, a da ju čovik pita na ča konkretno, e, verujte da ne bi umela odgovorit. Jednako njoj pače i politika, i priroda, i društvo, i vremenska prognoza. Jedino ča bi mogla stalno gljedat su reklami. Najveć voli one, kako bi ona rekla – za zdravlje, pa tako mi doma imamo jedan škabelin kade se te reklami fine. Pitate kako fine? E, pa tako aš ona saku mast za zglobi ka se reklamira mora provat, pa njoj, naravno, ni jedna ne pomore, pa ta ista mast fini va škabelinu. Isto vredi i za vitamini, za kapi, biljne tableti, pripravci i čaji. Ako ovako nastavimo, do kraja leta moć ću opret biljnu apoteku. Magistru već iman. Videt ću kako bude hodil ta biznis, ako bude štekal, još vavek moren položit za vozit bus, tr bar va Autotroleju ima slobodneh radneh mest, a moren i bus kupit pa – vozi Miško, za kamo god ki će i kada će. Pu mane bez čekanja. Intanto si mi, skupa z ovakoven gradon, va tri one ke se ne spominju ako si pristojan.