Volin kad ov kantunić moren počet z nečen ča j’ lipo. A kade ćeš veće lipote od toga da j’ Novi list pokla fanj vrimena dobil bebicu. Mislin, ni ju dobil Novi list leh su ju dobili Bruna i Petar, a kako j’ Bruna naša kolegica i prijatelica, onput koda smo Cvitu dobili si mi skupa. Intanto, Cvita se rodila na 10. petoga, ima tri kila i sto, a vela je 48 centimetri. Prava pravcata pinka kruha. Moran van reć, da smo tu miću čekali od tretega petoga, ma ona nikako da zijde. Bolje da van ne povedan ča smo se govorili doklen je Bruna molila i prosila malicu da zijde. Ma, Cvita se j’ pojavila kad je nju bilo volja, a ne kad je drugoga. Neka njoj život bude dug, srićan i lip. Va skladu z imenon – se njoj cvetalo! Brune, Petru i celoj familje, čestitke i aplauzi!

Lipote j’ bilo dosti, čisto da se ne predoziramo, pa gremo na njurganje. Njurgamo na se. Nekada z razlogon, nekada bez razloga. Ov put je na redu Autotrolej. I sada se vi pitate ča j’ tu novoga, tr ž njen niki već let i let ni kuntenat. I ča da van ja sada rečen osin da nisu leh oni krivi da imaju već busi leh šoferi. Pa danas ti je lagje kupit bus nego nać onoga ki će ga peljat. Najprvo kada su rekli da će za šoferi doć strani radniki, bilo j’ – avah je nan. Sada kad su reducirali broj vožnji na nekemi linijami, a i neke cele linije, aš nima šoferi, e onput bi bili i ovi z Nepala dobri. Ma, sada j’ kasno plakat. Ćemo malo već hodit, a sled se manje vozit. Moja j’ mat rekla da se to nju ne dotiknjeva aš da ionako od kauča do sudopera i postelji ne koristi bus.

Ona leh pazi da ne zgubi šćap aš to j’, kako j’ rekla njeji – osobni asistent. Ki put daljinski, ki put oružje, a ki put partner va igre na skrivaljca aš osin šetokalci od keh se jedna vavek skrije, i ov njeji štap rad ima tu igru. Ne moran van ni reć da san ja i za to kriva aš ki j’ šćap kupil? Ja. A zibrala san baš onoga dešpetljivoga ki se voli skrit. I se to njoj za dešpet. Kad rečen da ću kupit drugoga ako njoj ovisti ni po volje, dobijen po sebe – da bin leh hitala i rashićevala soldi i da mi ni pokojnoga oca i nje da ne bin niš imela aš da san huja leh pijani milijarder. I tako smo, gospa roditeljica, šćap i pijani milijarder, već dve večeri spred televizije i gljedamo Eurosong. Bolje j’ reć da se ja trsin gljedat, ma od nje ne moren ni videt, ni čut. Maše z rukami i mlati zajikon od prve do zadnje minuti. Ja stalno govorin – mat, kod dragoga Boga te prosin, muči malo aš niš ne moren čut. Ma tu pomoći ni. Jače je od nje. Briga nju ki ča pjeva, skuda je, jedino okol čega se pojida je kako j’ ki obučen. Najprvo j’ se po spisku onemi ki su celi ta šušur zamisleli aš da kamo njin se preši kad se se tako brzo odvija da ona ne dospene videt ni kanta li muški ale ženska. Onput nastavlja da kad malo bolje promisli, i da j’ sporeje ne moreš znat gljedaš li va muško ale žensko. Onput moran klast na najače ton da ona dešifrira spol pjevača. Kad smo se to narihtale bilo je – gljedaj, ov je gole riti došal, ova ima cici na izvolte, ovi da va škuromu vidiš drek ti vrite umre.

Majčice mila, ča j’ ova došla ležat na Eurosong ale kantat? Ki j’ ovo pustil na pozornicu? Ima ova golotinja roditelji… I tako smiron. Nisan znala bin se smela ale plakala od muki. Jedini komu ni našla zamjerku na obučivalo i nastup je, kako bi ona rekla – naš malčić. Ja, to se zajedno vidi da ima kućni odgoj, da j’ kulturan i fin deškić. Jedino njoj ni bilo jasno zač se zove Lazanja kad je Marko jedno jako lipo ime, ko j’ poznato va celomu svitu. Pozabila san da s nami Eurosong gljeda i šćap pa san joj rekla da roditelji od Marka imaju pašticeriju pa on z imenon reklamira obiteljski biznis. Šćap je skoro finil na momu hrbatu, pa neka ja još seren, koda ona ne gljeda televiziju i ne zna čigov je malčić. Najraje bi ju bila pitala ako mu j’ more bit bila i na kršćenju, ma san pregrizla zajik i pitala ča misli ki će pobijedit. Dakako da malčić z Umaga, ma kad san njoj rekla kako bi i mane bilo drago ma da ta spektakl jako puno košta i da nan ne rabi još i ta strošak, odgovorila je:

– Kako i vavek do sada, se će to narod platit, da ne rečen pozlatit.

I sada čekamo večeraska pa ako Marko Lazanja dobije, ću njoj reć da leto dan od sake penzije mora dat pet posto.