Pasala j’ još jedna šetemana, a političke vode nisu niš manje mutne leh su bile. To su pregovori, dogovori, pozivi, sastanki, rastanki, uhajanja, zihajanja, kumpanjanja… Vrime je va semu tomu relativan pojam aš komać pospojin ki bi s ken i zač mogal va dogovor, i pomislin kako j’ sad to teh sedandeset i kus ruk, kad, drek na žbice – piši kući propalo, oni ki su se frajali, već se ne frajaju. Kurberaj leh takov. Mislin da se i na stočnomu samnju manje cjenka leh va ovoj trgovine. A, ja kad su ta sakramenska fotelja, tabelica na stolu i debeli, debeli takujin tako slatki. Intanto, neka delaju ča god ih je volja, mane j’ jušto svedno. Samoj sebe čestitan na odluke da se neću pojidat okol nečega ča ne moren promenit.

Tako se ne pojidan ni okol ovoga munjenoga prolića. Mat skuca da j’ po stari dani postala, kako se ono to reče, pita me. Govorin joj – meteoropat. E, to san ti ja, sa kuntenta mi govori i nastavlja – vidiš, ja san to postala va 88. letu, a ti si to od kada si se rodila. Drek san, odgovaran, a ona vrnjeva – tr znan da si i puca od smeha. Da ne bilo kara prohajan z kuhinje, a ona zija – vidi malo ako san se pogodila z ten tvojen telefonon. Moje koleno govori da će do kraja dana past veli daž. Opiran tu aplikaciju i z hodnika zijan – piše da će past i to okol pete zapolne. Odgovara – past će za pol uri i šlus.

I onput nas dve čekamo da vidimo ki j’ bolji prognostičar, moja aplikacija ale njeje koleno. Verovali ale ne, vavek me dobije. Ako se sad pitate ako se naslajuje, a ne, pa opće se ne. Lahko da se leh za to. Evo van primjer – dan prvo Prvoga maja san bila slobodna, ma san imela fanj zaostaci pa san celo zapolne provela zad kompjutera. Zdurala je mučat jedno dve uri, a onda pita – ča ti nisi danas slobodna. Odgovaran – valjda vidiš da san ako san doma. Ona vrnja – vidin da si doma i da delaš.

Provevan njoj objasnit da delan kako bi mi na Prvi maj bilo lagje, ma to j’ koda zidu govoriš aš ona ima svoju teoriju – delo se ne nosi doma, čovik kad je slobodan je slobodan, samo munjeni delaju na blagdani i finjeva z onen š čen vavek fini – bilo bi bolje da si šla kurban nogi prat leh da delaš to ča delaš.

Kako ni nju ne moren promenit leh san obrnula na valcer i rekla – znan ja da ti njurgaš radi toga aš ja moran poć delat jutra, a ti bi tako rado šla s manun va Kastav na prvomajski fažol. Skočila je kod ofurena – leh da se zna, nikada va svojeh 88 let nisan bila ni na kakovoj parade, ni na kakoven fažolu, pa ne bib bila ni sad. A ta fažol i sa ta žerila za milijun ljudi, to ne bin jila da mi plate si soldi ovoga svita. Zač, zato aš si zvicijana ale postoji neki pravi razlog, pitan ju.

Nisan zvicijana nego va ti veli kazani more past sega vraga, more se tić posrat, more skakavac skočit, a o prahu da ni ne govorin. Nisan imela lazno raspravljat o higijenskimi propisimi okol kuhanja fažola pa san zamučala i nastavila delat, a ona j’ još dobreh kvarat uri namaljala ča se va kazan more past. Nisan mogla zdurat pa san rekla – a, more se neki od kuhari i oseknut. Znan da j’ gadljiva i da će njoj to usta zapret. Kako san pomislela, tako se j’ i dogodilo. Zamučala je i prošla va kupaonu. Do k večeru je bila dobra. Onput je počel Dnevnik i se j’ sopeta ško va trešće.

Va trešće j’ šal i moj plan da ću poć videt tu Kuću Halubajskega zvončara. Nisan, aš san morala rešit zaostatki. Presjednik govori da j’ Pentagon, ča mi se opće ni dopalo, a još manje mi se j’ dopalo to ča san ki’vo dan čula va oštarije.

Sede tri od njih i skoro su se okol te kući pokosmali. Jedan ju hvali na sa usta, drugi govori da j’ to jedno velo niš – hićeni silni soldi, a se črno i bez veze, još da ljudi nimaju ni kade parkirat ako bi šli nutar. Treti namalja da j’ to trebala bit kuća seh zvončari nekadanjeg kastavskoga komuna, a ne leh od Halubajci, a konobarica pak doleva ulje na oganj pa govori – ki van je kriv kad smo mi z Halubja najbolji.

Božić moj dragi, da ste leh čuli ta kar. Zijali su tuliko da jih je bilo čut na celomu onomu malo prvo spomenutomu komunu.

Mučala san i sama sobun mislela – ovi nisu normalni. Intanto, poć ću videt tu kuću pa ću van povedat svoji dojmi.

Za kraj leh jedan veli pozdrav gospe Darinke z Raba ka me j’ dala pozdravit mada se nikada nismo utaknule. I jedno velo hvala na podrške.

Naravno da moja mat isto misli da san dobra novinarka. Bonđorno!