Baš malo sedin onako sama sobun i mislin. O čemu? A o sačemu. I o onomu ča me se tiče, još već o onomu ča me se ne, aš znate i sami da j’ tako lagje. Intanto, zmed toga silnoga razmišljanja napamet mi pade nekakova studija o koj san negdere neš pročitala, a govori kako j’ ljubavni život mladeh va Hrvackoj na niskemi granami. On seksualni ni – da se valje razumemo. Ma, kako sako vrime ima nekakova svoja pravila, tako ga nosi i ovo današnje, pa vas lipo prosin, nemojte se sad zajedno batit kad van rečen da j’ ta sakramenska studija pokazala kako današnji mladi ne bacilaju jako za ljubav, njin je dosti zadovoljit telo, a za dušu se baš ne pojidaju jako. Dušu hrane na neki drugi načini leh ju je hranila moja generacija, a da ne govorin o onemi spred moje. Kako za sebe samu nikad ne bin mogla reć da san konzervativna, morda čak prvo preliberalna, malo san se zamislela nad samun sobun aš ono ča san pročitala okol te studije i mane je, neću reć zgrozilo, ma san pomislela – sa srića da niman doma nikakovoga šmrkavca ale šmrkavicu okol keh se moran pojidat. Najme, mane ni ćaro da neki z neken more poć spat dvajset minuti pokle ga j’ upoznal, a upoznal ga je z namjerun da baš to načini. Isto tako ne moren shvatit da neki menja partneri brže leh neki ljudi šetokalci, a bome ni to da jih va jednoj ludoj noći naslažu da me j’ sran i reć kuliko. Ča bi moja mat rekla – i pu blaga se zna red, a me par da se pu mnogeh mladeh danaska ne zna ni red ni poredak.

Kako mi j’ se to ča san pročitala dalo mislet komać sam doškala uobičajeno okupljanje va oštarije, aš na takoven je najbolja razmena mišljenja – altroke oni umni okrugli stoli. I tako sedi nas desetak, ki i inače dohajamo na razmenu mišljenja i ja povedan ča san pročitala. Pozabila san napomenut da najmlaji član okrugloga stola ima niti trejset let, a najstareji skoro sedandeset. Dakle, pokrili smo fanj generacij. I jušto taj najstareji, pokle moga izlaganja, govori – a, ja ča se čudiš, tr imaju pravo. Da ča će bit bedasti kod ča san bil ja – najprvo san z jednun kortejal jedno dve leta, onput smo se za ruku držali još leto dan, pa smo se i bušali, ma moja ruka ni smela spod njejega pasa, da bi se to skupa trajalo okol pet let i kad san prošal na prvi vijaj, to su bile suzi da bi Rečina poplavala, a kada san se pokla deset meseci vrnul ona j’ bila zaručena z drugen. E, da mi j’ onda bila današnja pamet. Rekla san mu da j’ bolje ča z takovun ni finil, a on je odgovoril – ja, lahko j’ tebe govorit, ma mane i dandanaska kad ju utaknen srce zaboli. I na, ča ne bi bilo bolje da san ja kod ovi današnji mladi – seks bez obavez i mirna Bosna. Ni bilo za smet se, ma mi smo se sedno nasmeli aš znamo da mu ni dugo rabilo da najde novu, oženi se i ima lipu i brojnu familju. Ma, prva ljubav je prva ljubav, a za nju se reče kako zaborava nema.

Jedna od kumpanije, let pedeset i ka, rekla je da se ona domišlja svoje prve ljubavi. Da j’ to bil Zdravko Čolić. Srce Isusovo, da ste vi mogli videt kako smo mi si skupa prasnuli va smeh, a ona se ofendila. Nikakovo čudo da se je aš ono ča smo njoj zidelili pas z maslon ne bi pojil. I ki zna ča bi još da taj dečko od niti trejset ni pital – je to onaj koji pjeva »Glavo luda« i izgleda kao trećerazredni žigolo. Zbilja ne znan ča ju j’ već pogodilo – to ča smo njoj mi zidelili ili to ča njoj je ta balavac uvredil prvu ljubav. I ne znan zač se j’ baš na me stavila, aš prvo leh je popala boršu i demonstrativno prošla, obrnula se je k mane i rekla – ti nemaš prava ništa govoriti, da nisi s 15 godina našla Igora, ni do dandanas ne bi nikog našla. Tko bi te takvu kakva jesi – jezičava, prgava i uvijek najpametnija?

Oprostite na izrazu, ma ja san ostala kod posrana aš se zbilja ne doživljavan takovun, a i nikad nisan razmišljala o tomu kako bi moj ljubavni život tekal da nisan utaknula Igora. Intanto, nisan njoj niš grdo odgovorila, samo san rekla – imaš pravo. To moje »imaš pravo« još ju je jače razjadilo da j’ tako udrila z vratimi od oštarije da smo misleli da će otpast. Si smo zamučali, i mučali fanj dugo. Onput je on najmlaji rekal – uf, oni dani u mjesecu. A on najstareji dodal – već su njoj davno pasali. Ostatak je prasnul va smeh, a nju od toga dana nisan videla pa ne znan su ti dani pasali ale nikad neće. Vranić zel i ljubav i moju zajičinu i znatiželju.