Rečki karneval

BIL JE, PASAL JE Čuda politike, čuda Tita, ma leh jedna štanja Jovanka

Slavica Mrkić Modrić

Foto Marko Gracin

Foto Marko Gracin

Bilo j’ očekivano da va povorke bude najveć Galebi, Tita, Jovanki i pioniri. Na izboru za najoriginalniju Jovanku definitivno pobjeđuje rečki gradonačelnik Vojko Obersnel. Ljudi moji, čovik je bil fenomenalan. I pravi Tito bi se zabunil da ga j’ utaknul



Pasal je i ovaj. Po broju ni vrit, ni mimo, aš trejst i sedan ni ni okrugal, ni jubilaran Rečki karneval, ma po letu va komu se j’ odvijal jako značajan, aš seh oneh jedanajst tisuć maškar ke su nedelju i tapale i klepetale Korzon, bile su del maškarane europske prijestolnice kulturi. Rika j’ odvavek ne samo europska, leh i svjetska prijestolnica karnevala, ma kad se to dvoje, kako bi enolozi rekli – sljubi, e onput se dobije ono ča j’ nedelju jedino v Rike bilo moguće – pravi maškarani pakal va komu su si bili kulturni. Neki već, neki manje, ma va konačnice – niki ni pasal meju zmed satiri i degutantnosti. Je, bilo j’ i siteh i lačneh, i trezneh i pijaneh, i ovakoveh i onakoveh, ma se va granicami pristojnoga ponašanja. Došli su i stvarni i nestvarni političari, i živi, i mrtvi, i si, ma ni bilo nikakoveh razmiric med njimi. Usvojili su Rečki karneval i to jednoglasnun odlukun jušto kako to načine i si oni ki bar jedanput nogun kroče va ta rečki maškarani svit.


Važgali nismo ni ovoga, ni onoga, ni ovu, ni onu političku opciju, mišljenje ili seksualno opredjeljenje, leh onoga ki j’ odvavek kriv za se – slamnatoga nebožića, ovoga leta imena Krešo Mići Štrajkić, a si njegovi pomagači i simpatizeri za njen, ča će reć va dim će poć danas ale jutra. Istina, Gobo z Mošćeničke Dragi će poć va Svemir, ma na isto mu ga dojde.


Nedelju j’ Rika zbilja bila svit va malomu aš va teh 113 grup kuliko ih je pasalo va povorke bilo j’ i oneh z dalekoga, i oneh z bližeg Istoka, i oneh zapadneh, i seh. Sad je čuda mudreh glav ke postavljaju pitanje je se ta naš karneval opće trebal održat radi sakramenskoga koronavirusa? Pa valjda j’ neki zaključil da more, uostalon imamo mi čuda zvončari ki tiraju sako zlo, pa tako i koronu, a i ki put trebe pušćat ljuden na volju, pa si oni ki su se bojali virusa, neovisno bili va povorke ili oni ki gljedaju povorku, mogli su doma ostat i tamo bit doklen vas taj virozni šušur ne pasa.




Srićun dohtori su već dela imeli z pijanemi, nažalost i zadanjenimi, prekinutimi i natučenimi leh z viroznin. Kuliko ih se prehladilo, kuliko ih je kihnulo, to ćemo tek znat, a morda ni nećemo. I ako ne budemo, to j’ dobro aš onda smo lišo pasali. Oni ki nisu lišo pasali, odnosno oni keh je karnevalska svita dobro očešala, očekivano su bili političari, kod ča j’ bilo očekivano da va povorke bude najveć Galebi, Tita, Jovanki i pioniri. Na izboru za najoriginalniju Jovanku definitivno pobjeđuje rečki gradonačelnik Vojko Obersnel. Ljudi moji, čovik je bil fenomenalan. I pravi Tito bi se zabunil da ga j’ utaknul.


Sen grupan naklon do poda aš rabilo j’ se to zamislet pa i ostvarit, delavcima od Turističke zajednice ki su se to organizirali, još jedan, kod i sen voditeljon na karnevalskemi pozornicami ki su zapravo bili »maškarani« va živi karnevalski info punkt. Najveći naklon delavcimi Čistoće, aš čera j’ grad bil čist kod suza. Za seh nas ki već let i let pratimo rečka karnevalska munjesanja i znamo da su dečki z metlami i šmrkimi oni ki Rečkomu karnevalu stavljaju točku na »i«, to ni nikakovo iznenađenje.


Kod ča ni iznenađenje ni to da se si pravi maškaroni već pripravljaju za drugo leto, za 38. Rečki karneval.