Moskva j’ šla šoto. Rat va Ukrajine još vavek dura. Srbi su kupili protuzračnu obranu, a njihov presjednik, koga »od milja« zovu »picousti«, i zajedno da se ogradin aš ga nisan ja tako prozvala leh njegov narod, poveda da su se hitili va veli strošak zaspraven za bez veze aš da kakovo zračno naoružanje imaju njin susedi, da su mogli kupit i sprej protiv komari. Ma, ča god da on blebetal ne blebeće on to radi susedi nego radi puno jačeh snag s ken su već posla imeli, a ki se jedanput opeče i na mrzlo puše.

Će se NATO doselit na Baltik ale ne, niman pojma, ma znan da će se v Riku još šesto oneh električneh romobili, za ča moren leh reć da ča j’ preveć je preveć. I z uvoliko kuliko ih sad zvrnda gradon, ni lahko, aš ga ne čuješ doklen te ne zmasti. Oni ki ga voze isto baš jako niš ne čuju aš va većine slučaji imaju slušalice na ušijah pa j’ to katastrofa. Još kad onako sled zmućen greš pa ti zad hrbata nervozna trumbeta zasope, to ne znaš biš pod auto, biš pod romobil ale biš se polegal pa nek masti ki će. Tr od silnoga šoka srce j’ već va predinfarktnom stanju.

Jedna moja kolegica je rekla da se j’ tako prestrašila da j’ zavriskala koda ju napadaju se sili ovoga svita. Još da j’ bilo i škuro pa da, kako malo slabeje vidi po noće, ni va prvi mah dokončala ča njoj to trubi, leh da j’ videla jedno velo oko i niš više. To oko da j’ tako brzo kraj nje pasalo da ju j’ skoro zavrtelo, a taman da se j’ pripravljala z boršicun po hrbatu onoga ki ga pelje. Od onda si ti sakramenski električni romobili zovemo »velo oko«. Intanto, teh »veleh očij« je koš i još, i ja zbilja ne bin imela niš protiv da jih je va gradu i okolo njega još i već kad bi bili Rika bila, recimo Ljubljana, pa imela biciklističke stazi. Ovako, ni druge leh kacigu na glavu, štitniki na kolena i na lakti i »vozi, Miško«. Najme, sigurneje je vozit to čudo leh hodit i čekat kad će…

A more bit je celo gradska uprava razmatrala ov problem pa ni imel ki doć pozdravit Romi ki su imeli skup va gradskoj vjećnice. A, ja bit će najprvo da j’ tomu tako. Nadan se da će raspravit do Đurđevdana, pa da će ih neki od grada doć pozdravit va njihovu kuću, kad jih već nisu va svojoj. E, moj Surija, znan ja da ni lahko bit Rom, a kamo Cigan.

Jutra j’ Vazam. Znači da danaska ni mira va kuće aš rabi popiturat jaja, šunku skuhat, kapulicu pripravit, poć va butigu kupit se ono ča još rabi, aš vavek još neš rabi, a za si oni ki imaju uvjeti rada kod ča jih iman ja, još i popit dve pastilji od smirenja aš bi osin Isusića još neki mogal bit razapet, ma ne i uskrsnut. Kako san ja ranjena va ruki, ovo j’ citat od moje materi, pogačicu i se slično moran kupit aš ona već ne more mesit, a ja, kako ste mogli i pretpostavit – ne umen. Iskreno, ja za se ča j’ slatko baš i ne bacilan, ma ono prez česa od mićega ne moren zamislet Vazam je šišer ale kako bi neki rekli – šišor, pletenica…

San se požalela Vlaste Sušanj Kapićevoj kako mi ga nima ki načinit pa se j’ smilela i rekla da j’ ona načinila već dva pa da more i tretega. Tako san i to odbavila. Ma, zadovoljstvo mi j’ bilo kratkoga duranja aš se j’ z trosjeda javil zmaj ki pita da kade mi j’ janjčevina. Presiklo me je aš san mislela da smo ta problem pred ko leto apsolvirale, ma drek smo. Najme, od kada oca ni, za Vazam ne bi trebelo bit ni janjčevine aš ju niki od nas tri ne ji. Ma pu nas logika ne biva, pa ja sako leto moran kupit baren kilo janjčevine aš red se mora znat, to ča ju niki neće pojist, to j’ manje važno. Ta ista janjčevina se mora i speć, a onput se ako ki janjoidac ne dojde pohićeva po kuće dok ne fini tamo kade ne bi trebela finit. Dakle, luda kuća. Intanto, čeka me fanj dela, a ako sopeta bude njurgala da bakalar na belo ni dobar, da j’ sir preslan, a šunkica još i već, da j’ patka štupasta, da j’ salata preveć začinjena i da jaja nisu dobro popiturana, e, onput ne garantiran za svoje ponašanje. A, morda me ovo leto i iznenadi.

Za kraj, leh podsjetnik – večeras sopeta »Zvezdi pjevaju«, ča znači – glasajte za oni naši huncuti. Pazite na »vele oči« i srićan van Vazam.